Неврологот Јован Божиновски е новиот директор на Клиниката за неврологија, откако Министерството за здравство експресно го разреши д-р Игор Кузмановски поради скандалот со објавената снимка на социјалните мрежи на која се гледа како меша бела прашкаста материја и коментира за квалитет на кокаин.
Уште поголем проблем за д-р Кузмановски е и тоа што тој во моментов нема активна лиценца за работа од Лекарската комора. Цели седум месеци, односно од 15.03.2025година тој ја вршел дејноста без продолжена лиценца..од Комората информираат дека тој минатата недела поднел барање за нејзино продолжување и засега, постапката за обновување е во тек. Министерот Алиу најави детална истражна постапка околу работата на Кузмановски.
“Формирана е комисија од Министерството за здравство, побарав инспекциски надзор за работата на докторот. Се испитува во ‘Мој термин ‘дали во периодот од 15 март, кога му истекла лиценцата, до 8 август, кога станал директор, работел со пациенти. Случајот ќе го испитува и Државниот санитарен и здравствен инспекторат. Повеќе од ова не можам да дадам информации“, рече министерот.
За да ја обнови лиценцата за работа, а за која е пропуштен рокот, д-р Кузмановски мора да има дополнителна обука и да полага стручна проверка пред комисија. Во меѓувреме, новиот директор на Неврологија вели дека Клиниката продолжува со непречена работа. Д-р Кузмановски беше назначен за директор на 8-ми август годинава, на местото на Фатмир Меџити.