Повисоки пензии за 2500 денари месечно, поголеми суми за плати во здравството и образованието, како и повеќе пари за редовно усогласување на платите во администрацијата. Владата на седница го усвои Предлог-буџетот за 2025 година кој носи стабилизација на јавните финансии и економски раст. Расходите ќе бидат за 10% поголеми од годинава или 6,5 милијарди евра. Приходите пак ќе бидат зголемени за 13% и ќе достигнат 5,82 милијарди евра. Дефицитот се стабилизира на ниво од 4% од БДП или на 682 милиони евра. Владата особено сака да вложува во развој, па затоа капиталните инвестиции се на рекордно високо ниво од 823 милиони евра. 250 милиони евра од овие пари ќе завршат кај општините за инфраструктурни проекти.
Предлог-буџетот поддржува политики за подобрување на животниот стандард. Така за исплата на пензиите и предвиденото зголемување од 2.500 денари се предвидени 1,7 милијарди евра или за 244 милиони повеќе од годинава. За покривање на дупката во пензискиот фонд ќе се одвојат речиси 400 милиони евра од централниот буџет.
За исплата на плати се обезбедени 780 милиони евра и дополнителни 32,5 милиони евра во блок дотации за зголемувањето на платите во образованието. Министерката за финансии напомена дека во буџетот има бафер за евентуално зголемување на минималната плата, но остави да завршат преговорите со синдикатите и работодавачите, за да соопшти повеќе детали.
За поддршка на ранливите категории се предвидени 235 милиони евра или 8 милиони евра повеќе пари. За здравствена заштита се обезбедуваат 84,5 милиони евра повеќе или вкупно 868 милиони евра.
Димитриеска Кочоска напомена дека следната година и ќе се штеди. Непопуларната ставка стоки и услуги која секоја Влада драстично ја зголемуваше, следната година ќе остане на исто ниво. Кратење на трошоците ќе има за набавка на мебел и возила.
Економскиот раст е проектиран на ниво од 3,7%, буџетскиот дефицит на 4% од БДП и инфлацијата на 2,2%. Дефицитот ќе се покрива со задолжување дома и во странство. Еврообврзницата која доспева за враќање во јануари во износ од 500 милиони евра, најверојатно ќе се покрива со заем од Унгарија. Јавниот долг, согласно стратегијата треба да се сведе на ниво од 64% од БДП, а умереното ниво од 60% до 2029 година.
