Интересна, но не и толку жестока кампања за локалните избори очекуваат аналитичарите. Копјата ќе се кршат за локални теми, но и за решавање на долгогодишни политички проблеми. Додека граѓаните ги интересираат урбанизмот, справувањето со недостаток на паркинг, паркови, игралишта, градинки, кучињата скитници, партиите во обид за глас плус ќе зборуваат и за корупција, здравство, образование, ЕУ интеграции. Според аналитичарите, овие избори треба да покажат кои политичари навистина планираат да се зафатат со работа, а на кои им е единствено важно да дојдат до власт.
„ВМРО-ДПМНЕ, ЗНАМ и ВЛЕН одат по општини и зборуваат за болници, амбуланти, градинки, локални проблеми, заедно сите ветуваат и најавуваат проекти од еколошки карактер за Скопје. Од друга страна, немате ништо. СДСМ е научен дека власта доаѓа од странци, дека треба некој да ги викне, да им гарантира дека ќе бидат власт“ – вели новинарот Драган Павловиќ Латас.
„Изборите се одвиваат во една политичка атмосфера која е таква каква што е и има национални теми што не можат да се избегнат. Голем дел од темите ќе бидат локални, но партиите ќе продолжат да комуницираат на национални теми без разлика на локалните избори“ – вели аналитичарот Петар Арсовски.
Негативната кампања не може да се избегне. Очекувањата се дека таа ќе биде присутна и овојпат. Сепак, упатените сметаат дека граѓаните веќе станале имуни на разни подметнувања и лажни вести, па главно ќе гласаат за човек и според тоа кои им се приоритетите во локалните заедници кадешто живеат.
Најостра реторика се очекува да користат партиите од албанскиот блок. Најжестока битка претстои во скопските општини, но и општините во Западна Македонија.
Во следните 20 дена граѓаните ќе имаат можност да ги слушнат ветувањата и пораките од канидатите за градоначлници и советници и директно да разговараат со нив на организирани средби во нивните општини.
