🎥 Амбасадорката на Израел во Македонија, Вивиан Ајсен: Војната со дезинформации е една од најтешките битки

Амбасадорката на Државата Израел во Македонија, Вивиан Ајсен, која ја презеде должноста на 25 јули 2025 година, објави официјално соопштение во кое ја нагласува важноста на точната и објективна информираност за настаните поврзани со конфликтот на Блискиот Исток.

Во нејзината изјава, амбасадорката Ајсен потсетува дека од 7 октомври 2023 година – ден кој го опиша како најкрвавиот ден за еврејскиот народ од Холокаустот наваму – Израел се соочува со војна на повеќе фронтови: Газа, Либан, Иран, Сирија, Ирак, Јемен, како и подрачјата Јудеја и Самарија.

„Но, една од најтешките борби е онаа за вистината – медиумската војна,“ истакна таа. „Меѓународните медиуми често ја искривуваат реалноста. На 7 октомври, илјадници терористи од Хамас ја нападнаа Израел, извршувајќи незамисливи злосторства: сексуално насилство, убиства на деца пред нивните родители и обратно, цели семејства живи запалени, и масакрирање на над 1.200 цивили.“

Во нападите биле киднапирани 251 лице, од кои 50 сè уште се држат како заложници во Појасот Газа, во тешки услови – под земја, во тунели, без светлина, храна, вода и хигиена.

„И покрај сето ова, Израел – жртвата на овие ѕверства – често се прикажува во медиумите како агресор,“ нагласува Ајсен.

Како последен пример за манипулации, таа го посочи т.н. „кампања за глад“ организирана од Хамас, чија цел, според неа, е да го спречи доставувањето хуманитарна помош доколку таа не поминува преку нив. „Познато е дека Хамас ја злоупотребува хуманитарната помош за да го зајакне своето владеење и повторно да се вооружи. Обвинувањата дека Израел ја блокира помошта се лажни – секојдневно Израел овозможува влез на стотици тони хуманитарна помош во Газа,“ рече таа.

Како одговор на ширењето на дезинформации, амбасадорката објави дека редовно ќе споделува факти и ажурирања преку соопштенија за медиумите, со цел јавноста да има пристап до проверени и точни информации.

„Ве повикувам да ги консултирате следните линкови со официјални податоци и документација,“ додава таа, истакнувајќи ја важноста од информирање базирано на факти.