По скандалот и реакциите во јавноста, градоначалникот на Кавадарци, Митко Јанчев, го образложи прекинувањето на настапот на познатиот српски пејач Аца Лукас во петокот околу полноќ, по интервенција на полицијата.
„Интервенцијата беше неопходна поради сериозни безбедносни прекршувања и пренатрупаност на локалот“, објасни Јанчев. Тој нагласи дека кафетеријата има капацитет за околу 200 гости, додека внатре биле присутни повеќе од 700 лица. „Општината нема да дозволи да се повтори нешто како трагедијата што ја видовме пред неколку месеци во Кочани. Нема да дозволиме пренатрупани локали без основни безбедносни мерки“, додаде Јанчев.
Тој објасни дека организаторите претходно побарале дозвола за користење на дополнителен јавен простор за маси, но барањето било одбиено од безбедносни причини. Дополнителни прекршувања вклучувале надминување на работното време ограничено до 01:00 часот и непридржување кон обврските за пријавување на ангажманот на изведувачот.
Самиот Аца Лукас на Инстаграм објасни дека огромниот интерес и присуството на околу 2.000 гости предизвикале гужва, што довело до интервенција од страна на полицијата.
