Во рамки на студиската посета во Париз, делегацијата составена од претставници на Министерството за јавна администрација, Центарот за управување со промени, Агенцијата за администрација и Министерството за дигитална трансформација, изминатите денови оствари работни средби со претставници на Директоратот за јавна администрација на Франција (DGAFP), Институтот за јавен менаџмент и економски развој (IGPDE) и Директоратот за дигитални работи (DINUM).
-За време на средбите беа презентирани француските искуства и добри практики во областа на меѓуинституционалната и меѓуминистерската соработка, развојот и спроведувањето на политики за обука и професионално усовршување на државните службеници, како и современите пристапи во дигитализацијата на процесите за учење и развој на човечките ресурси во јавниот сектор, информираат денеска од МЈА.
Посебен акцент бил ставен на платформата MENTOR – национален систем за е-обуки на државните службеници во Франција, преку кој беа презентирани искуствата поврзани со нејзиното воспоставување, управување и користење. Дополнително, биле разгледани и актуелните трендови во примената на новите технологии и дигиталните алатки во процесите на обука и континуирано стручно усовршување на јавната администрација.
-Работната посета претставува значајна можност за преземање на успешни европски практики во развојот на системот за обука на административните службеници во Македонија, велат од Министерството.
Посетата била организирана во рамки на проектот „Поддршка за воспоставување на Академијата за стручно усовршување и обука на административни службеници“, кој го спроведува Министерството за јавна администрација во соработка со Центарот за управување со промени, со поддршка на Амбасадата на Франција.
