Демократска партија на Турците на Македонија (ДПТМ) соопшти дека внимателно, одговорно и со висок степен на посветеност го следи процесот на донесувањето нов закон за високото образование, се наведува во соопштението на партијата.
Во таа насока, преку континуирани консултации со релевантни институции, како и со експерти од областа на правото и образованието, нашите ставови, оценки и резерви – особено во однос на заштитата на правата и стекнатите придобивки на турската заедница – јасно и недвосмислено се пренесуваат до надлежните институции.
Посебно потенцираме дека секое законско решение кое би можело да го ограничи правото на образование на различни јазици или да создаде основа за затворање на универзитети и студиски програми е неприфатливо. Принципите на повеќејазичност и образовен плурализам, гарантирани со Уставот, мора да се зачуваат, унапредат и дополнително да се зајакнат.
Демократска партија на Турците на Македонија (ДПТМ) ги поддржува сите конструктивни реформи насочени кон унапредување на квалитетот на образованието. Сепак, јасно истакнуваме дека нема да поддржиме никакви решенија што ги ограничуваат уставните права, го нарушуваат општествениот баланс и ги поткопуваат демократските вредности.
Во наредниот период, преку нашиот пратеник, ќе предложиме конкретни измени во Собранието, со цел да придонесеме кон изнаоѓање правично, инклузивно и одржливо решение.
Нашиот став е јасен: демократијата се зајакнува само кога сите заедници се еднакво и правично претставени. Со оваа определба ќе продолжиме со нашата решителна заложба за заштита на општествените права, зајакнување на уставниот поредок и унапредување на демократските вредности.
