Македонската економија заздравува и се движи во добра насока, поставени цели и проекции се остваруваат. Сериозниот пристап и внимателното проектирање и водењето на економските политики ги даваат своите резултати, се вели во соопштението од ВМРО-ДПМНЕ кое МИА го објавува интегрално.
Најновите податоци на Државниот завод за статистика, покажуваат дека минатата година ја завршивме со раст на БДП од 3,5%, додека во четвртото тримесечје растот на економијата изнесува 3,8%.
Растот на економската активност во четвртиот квартал е на широка основа, додека посветеност на Владата за реализација на капиталните инвестиции доведе до силна динамика на растот на градежништвото кој достигна 14,6%, кој се должи на зголемената активност во нискоградбата која забележа реален раст од 12,5% во четвртиот квартал.
Висок раст од 8,1% е забележан кај стручните и научни дејности, во трговијата и транспортот 4,4%, 3,6% раст во преработувачката индустрија, 2,7% во дејности со недвижен имот и така натаму.
Позитивно влијание врз економската активност имаше и нето-извозот, така што извозот на стоки и услуги порасна за високи 9,7% на реална основа, додека увозот за 3,3% и ова упатува на понатамошно закрепнување на извозната активност започната од почетокот на годината, по намалувањето во изминатите години.
Од друга страна, поддржана од растот на платите, приватната потрошувачка остана стабилна со реален раст од 2%.
Овие бројки не се обични проценти, туку истите се јасни показатели кои претставуваат потврда за добро планираните и спроведени политики кои доведоа до позитивните економски движења во земјата.
Исто така, покажуваат континуитет во остварувањето на позитивни резултати во економијата кои создаваат услови за постигнување повисоки стапки на раст кои ќе доведат до подобар животен стандард.
Од преземањето на одговорноста ВМРО-ДПМНЕ да ја води владата, веќе шест квартали по ред македонската економија бележи позитивен раст на БДП од 3 или над 3%.
