Поранешната специјална обвинителка Катица Јанева, која е осудена на седум години затвор, од кои веќе четири години ги помина во КПД „Идризово“, на почетокот на неделата заминала дома.
Директорот на затворот Идризово соопшти дека Јанева добила условен отпуст и дека таа ќе мора редовно да се јавува во Основниот кривичен суд Скопје, сè додека целосно не ѝ истече седумгодишната затворска казна.
Во јули 2021 година, Апелациониот суд Скопје ѝ ја потврди седумгодишната затворска казна на Јанева, во која е пресметано и времето поминато во притвор од над една година.
Јанева и лани беше пуштана преку ден да работи во адвокатската канцеларија на својот син во центарот на Скопје, а попладне се враќаше во „Идризово“.
По доаѓањето на новото раководство во Управата за извршување на санкциите, била извршена контрола врз нејзиното работење. При контролата било утврдено дека таа не работи кај својот син, поради што ја изгубила таа привилегија.
Катица Јанева беше осудена за земање мито.
