Традиционално пријателство, меѓусебна поддршка и разбирање и заедничкa стратешка цел за членство во ЕУ ги карактеризираат македонско-црногорските односи, беше заклучокот на денешната средба на претседателката Гордана Сиљановска-Давкова со претседателот на Црна Гора, Јаков Милатовиќ во Цетиње.
Претседателите, како што соопшти Кабинетот на Сиљановска-Давкова, разговарале за европската перспектива на Западниот Балкан, предизвиците со коишто се соочува секоја од земјите на интегративниот пат, како и за можностите за нивно надминување.
Посочувајќи дека Црна Гора е земја-предводник во преговарачкиот процес со ЕУ, Милатовиќ изразил силна поддршка за секој направен исчекор во македонските интеграции.
Денешното заедничко учество на Балканскиот форум за интеграција 2025, за него е препознавање на европскиот интерес за регионот и одлична можност за споделување на искуствата.
Како поборничка на регионалниот пристап во евроинтеграциите преку меѓусебна соработка и поддршка, претседателката ја потенцирала важноста од градење добрососедски односи со отворен и искрен дијалог, со избегнување на ветото.
Сиљановска-Давкова укажала дека сѐ додека од нас се бара исполнување на дополнителни услови, надвор од Копенхагенските критериуми, ќе постои опасност од непочитување на основните вредности и принципи на ЕУ, без коишто таа се сведува на политичка и бирократска машинерија.
На средбата, Сиљановска-Давкова упатила покана за возвратна официјална посета на Милатовиќ на земјава, што тој со задоволство ја прифати.
Двајцата претседатели во Цетиње го посетија Музејот на Крал Никола.
