Гласовите во недела треба да означат победа, не само во бројки, туку и победа на свеста и верување дека Македонија заслужува подобро, порача лидерот на ВМРО-ДПМНЕ, Христијан Мицкоски, на последниот ден од кампањата. Апелира граѓаните на вториот круг да излезат и да гласаат гордо, достоинствено и во мирна атмосфера, како и пред две недели.
Лидерот на СДСМ, Венко Филипче, пак, апелираше граѓаните да гласаат за неговата партија во 17-те општини каде бараат мандат, порача дека програмите биле скроени по сугестии и по мерка на граѓаните. Онаму каде што немаат кандадати да гласаат по сопствено убедување.
Во вториот круг од локалните избори во Македонија ќе се гласа во 32 општини и Градот Скопје, а на три избирачки места во Општина Шуто Оризари ќе има прегласување за советници, поради утврдени негеруларности. Вчера почна дистрибуцијата на 1.013.357 избирачки ливчиња.
Во четирите општини каде што не беше постигнат цензус на првиот изборен круг на 19 октомври, Гостивар, Врапчиште, Центар Жупа и Маврово и Ростуше ќе има повторување на изборната постапка за избор на градоначалник 60 дена од објавувањето на конечните резултати од локалните избори 2025. Според информациите на ДИК, за вториот круг пријавени за гласање се 4.826 болни и изнемоштени лица, кои ќе гласаат утре.
