Едно лице е повредено попладнево во вооружен инцидент што се случил во центарот на Куманово, на улицата зад општинската зграда. Според досегашните информации, повредениот е Зеќирија Шаини, вработен на скопската Клиника за пулмологија и носител на советничката листа на ДУИ во Општина Липково.
Од МВР информираат дека пукањето се случило нешто пред 14 часот, и дека Шаини прво бил пренесен во Кумановската болница, а потоа во скопските клиники. Според Кумановското обвинителство кое прибира докази, првичните информации велат дека засега немало индиции дека мотивот за нападот е политички.
Од ДУИ брзо по инцидентот излегоа со соопштение, барајќи итно разоткривање на сторителите од страна на МВР и Обвинителството, а во знак на револт и сочувство со Шаини, ги прекинаа сите останати денешни активности.
И од владејачката Вреди го осудија инцидентот, изразувајќи длабоко жалење за повредениот доктор Зеќирија Шаини. Министерството за здравство најави целосна поддршка за докторот и негово побрзо опоравување, осудувајќи ги насилствата врз лекарите. Ветија дека во периодот што следи ќе работат интензивно со останатите институции во Куманово до целосно расчистување на случајот.
