Куферчиња со пари од Бугарија за продажба на националните интереси. Мицкоски со сериозни тврдења дека Заев зел пари од поранешен бугарски премиер. Од Струмица упати директна порака дека сите ќе одговараат, а времето на примање пари во куферче за да се испорачуваат компромиси на грбот на нарадот заврши.
-Ќе ви се скинат и куферчињата пари од источниот сосед, а ниту во зградите и визите од Дубаи имаат среќа. И сакам една порака до сите нив: тоа што година и три месеци сè уште не стигнала правдата до вас, тоа што година и три месеци секој ден, час во денот и неделата го минувам на градење на темелите што ги рушеа, не значи дека заборавив. Јас ви ветувам дека правдата ќе ве стигне, изјави Мицкоски.
По обвинувањата од Мицкоски, со објава на Фејсбук реагираше Заев. Тој ги отфрла тврдењата и го обвинува премиерот дека клевети.
-Најостро и категорично ги отфрлам лагите и клеветењата од Мицкоски за наводни “куферчиња со пари од поранешен премиер од Бугарија” како невистини и како очаен обид на неспособниот премиер да го пренасочи вниманието на јавноста од неговите неуспеси кон неговите измислици. А, кога сме веќе кај куферите, видовме во снимките што сами си ги пуштија во јавност дека експерти за куфери со пари се токму неговите поддржувачи и финансиери, реагираше Заев.
Инаку од ВМРО-ДПМНЕ претходно тврдеа дека Бојко Борисов своевремено сам кажал дека лично ја помогнал опцијата на Зоран Заев за доаѓање на власт.
Кога станува збор за примање пари од страна на Зоран Заев, јавноста беше сведок и во минатото. Пред речиси една деценија се појави видео на кое што се гледа и слуша како Заев ги користи зборовите „едно евро за Вицето, едно за црквата“. Подоцна во судскиот случај именувам „Поткуп“, бизнисменот Иван Николов Сачевалиев сведочеше дека во 2013-та година, кога Заев беше градоначалник на Струмица, од него било побарано да даде поткуп.
Матеја Петровски
