🎥 Набавката на 100 нови амбулантни возила е добра вест за лекарите и граѓаните

Силната инекција за здравството од сто нови , модерно опремени амбулантни возила ќе биде од голем бенефит за пациентите и здравствените работници – лекарите ја поздравија одлуката на Владата за набавка на нови возила кои ќе бидат распределени во јавните здравствени установи ширум цела држава. Приоритет ќе бидат здравствените домови кои покриваат поголем број на население, а имаат недостиг на медицински комбиња.

Оваа набавка би била најголема досега, со оглед дека возниот парк во здравствените установи со години наликува на ‘крпен живот’ – амортизирани возила, чести дефекти, крпења, поправки, а ретко подновување со нови.

Од Итната медицинска помош во Скопје се надеваат дека ќе добијат голем дел од возилата.

Освен техничката освежување на Итната помош, се засилува и медицискиот персонал. Примени се нови доктори и медицински сестри, а бројот на тимови ќе се зголеми со добивањето и на новите амбулантни возила.

Возниот парк на здравствените установи изминативе десетина години најмногу се обновуваше преку донации.

Последен пат јавните здравствени установи во Македонија  добија 25 нови амбулантни возила во 2020 година. Од нив 12 беа за Итна помош, шест беа распределени во Скопје, а другите шест во здравствените домови во Крушево, Кичево, Крива Паланка, Берово, Струга и Дебар, што беше само капка во морето од потреби. 13 возила беа наменети за единицата за домашно лекување во градот Скопје.