Заменик-претседателот на Владата, задолжен за политики за Добро Владеење, Арбен Фетаи, денеска оствари средба со г-ѓа Кирстине Дамкjaер, заменик-извршна директорка на УНОПС, и г. Тим Ларднер, регионален директор за Европа и Централна Азија, во рамките на нивната официјална посета на Македонија, како и со амбасадорката на Швајцарија, г-ѓа Вероник Хулман, и раководителот на Одделот за развојна соработка при Амбасадата на Шведска – Микаел Атерхог.
За време на состанокот се дискутираше за плодната соработка во рамки на проектот „Поддршка за Европската интеграција на Македонија“, кој се спроведува од страна на УНОПС со поддршка на владите на Шведска и Швајцарија. Проектот претставува успешен модел на координација меѓу развојните партнери и домашните институции, ставајќи го граѓанинот во центарот на реформите.
Заменик-претседателот на Владата високо ја оцени континуираната поддршка од УНОПС, Шведска и Швајцарија и потенцираше дека доброто владеење, транспарентноста, владеењето на правото и борбата против корупцијата остануваат меѓу главните приоритети во процесот на европска интеграција.
– Посветени сме да ја продолжиме работата на изградба на силни, одговорни и отворени институции кон граѓаните. Преку блиска соработка со нашите меѓународни партнери, преземаме значајни чекори кон исполнување на европските стандарди и вредности, истакна Заменик-претседателот на Владата.
Учесниците на состанокот ја реафирмираа важноста на зајакнување на институционалниот интегритет и обезбедување на видливи резултати од реформите за граѓаните, како и ја изразија подготвеноста за натамошно продлабочување на соработката во иднина.
