Премиерот Христијан Мицкоски денеска му честиташе на градоначалникот на Општина Бутел за неговиот труд и постигнувања во изминатиот период, нагласувајќи дека општината доживува значителен напредок благодарение на реализираните и тековните проекти. Според Мицкоски, Бутел се наоѓа во период на препород.
„Треба да се заблагодарам за поддршката која Општина Бутел ја добива од пратеничката во Собранието, советниците, администрацијата и ресорните министри. Само ако сите овие компоненти функционираат хармонично, ќе можеме да постигнеме успех, како што гледаме тука во Општина Бутел“, изјави премиерот Мицкоски по поставувањето на камен-темелникот на мега-паркот во Радишани.
Тој изрази уверување дека општината ќе продолжи со реализација на нови проекти кои ќе придонесат за подобрување на квалитетот на животот на граѓаните. Според него, Владата ќе продолжи да ја поддржува оваа иницијатива без никакви двоумења.
„Честитам за досегашните постигнувања. Меѓутоа, пред нас има уште многу работа. За разлика од оние кои во минатото уништуваа и крадеа, оваа Влада и локалната самоуправа имаат амбиција да градат и ќе продолжат со тоа и во иднина“, додаде Мицкоски.
