Во врска со трагичниот настан во дискотеката Пулс, роднина на едно од повредените девојчиња од Кочани, кое е пренесено на лекување во Австрија, изрази благодарност до СОЗР и Владата на Република Македонија. Според него, институциите брзо реагирале и ги обезбедиле сите потребни услуги за повредените и нивните семејства.
„За само 15 минути ни беа обезбедени бесплатни летови, хотелски сместувања, превоз и стручна помош за преведување на документи. Организацијата беше на високо ниво“, рече тој.
Тој исто така сподели дека се наоѓаат на Универзитетската клиника во Грац, Австрија и дека реакцијата на институциите во Македонија била брза и ефективна. Владините тимови ги обезбедиле сите ресурси што биле потребни, како што се превоз и сместување, како и стручна помош во овие тешки моменти.
„Сакам да апелирам до сите семејства кои се засегнати од оваа трагедија да не се срамат и да се јават за помош. Да си обезбедат бесплатно сместување и хотелски услуги додека нивните деца се во болница. Исто така, имаме стручни тимови кои се грижат за нас и редовно ни даваат информации“, додаде роднината.
Тој сподели дека лекувањето на пациентите во Грац досега поминува одлично и се заблагодари на сите кои се мобилизирале за помош и поддршка.
