Пролетната сеидба се одвива во иделани временските услови, а земјоделците успешно се справуват со последиците од климатските промени. И покрај се’ повисокиот данок кои го земаат галопирачките глобални климатски промени, македонските земјоделци оваа производствена сезона, засега имаат речиси идеални временски услови. Единствено, можеби повеќе влага е потребна само за житните култури, констатираат тие. Од Агенцијата за унапредување на земјоделството пак, уверуваат дека благодрение на мерките кои државата ги презема преку ИПАРД-програмите, земјоделците се’ поуспешно се справуваат и со неповолните последици од климатските промени.
„Земјоделците се борат секој на свој начин, меѓутоа генерално, она што државата го прави е следно – значи креираме мерки преку различните програми во делот на наводнувањето, во делот на копањето на бунари, значи таму каде што немаме системи за наводнување и во тој правец имаме такви мерки преку Програмата за рурален развој, ИПАРД-програмата за да може да се интервенира“, вели Горанчо Томески, дипл.агроном од Агенцијата за унапредување на земјоделството, Прилеп.
Во делот пак на заштита од плевели и од загадувањето на почвата и на водите, Томески уверува дека ние како земја – хемиските препарати, односно пестицидите, не ги користиме прекумерно, како што е случај во некои развиени земји.
„Меѓутоа, сепак треба да има малку поголема контрола во тој правец, затоа што сето тоа е оставено да се координира преку продавачите, односно земјоделските аптеки кои во суштина треба да имаат стручни лица кои даваат препораки и третмани за тие прскања, и во која доза, и во кои колични да ги применуваат земјоделците“, објаснува Томески.
Токму од овие причини, во моментов, претставници на Телото за управување со ИПАРД-програмите при ресорното Министерство веќе прават директни средби со земјоделците околу начините за користење на средствата за Мерка 1 од ИПАРД 3, а чија главна цел е „Инвестиции во основни средства за земјоделските стопанства“. А ова значи зголемување на ефикасноста, на конкурентноста, како и на одржливоста на земјоделското производство во земјоделско-прехранбениот сектор во склад со ЕУ-стандардите. Македонските земјоделци од оваа Мерка 1, годинава на располагање ќе имаат 7,4 милиони евра и за нив можат да аплицираат до крајот на месецов, информираат од ресорното Министерство.
Каролина Дурло
