Нови 12 закони се готват во Министерството за образование, за решавање на круцијалните проблеми. Министерката Јаневска соопшти дека се подготвува пакет од шест закони кој се однесуваат на дуалното, односно законот за средно стручно образование, како и закони за образование за возрасни, национална рамка на квалификации и закон за учебници.
Се подготвува и пакет од шест други закони од наредната година кои ќе се однесуваат на наставниците, потоа закон за педагошка служба, за државен испитен центар, како и закон за високо образование.
Министерката за образование рече дека повеќе нема да дозволи да се повтори проблемот со ангажман на асистенти во основните училишта и додаде и дека од наредната година новина ќе биде воведувањето на асистенти и во средното образование.
„Големата новина е што обезбедуваме и асистенти за средно училиште, нешто што досега го немаше и третото што сметам дека е важно, а сега го дискутирав со една од асистентите е тие да го следат ученикот во целиот образовен процес“, изјави министерката за образование Весна Јаневска.
Шесте нови закони за дуално образование Јаневска очекува да поминат на Влада и во Собрание најдоцна до октомври, а она што е најважно во моментов, а досега ниту една влада не го направила, е решавањето на проблемот со образовните асистенти односно нивното присуство во училиштата.
„Сепак и денес ќе се потпишуваат договорите. Значи во следните денови асистентите навлегуваат во училиштата. Во новите закони за основно средно и средно стручно ќе определиме рок во кој треба да биде завршена целата постапка, и тоа треба да биде готово во Јуни“, изјави Јаневска.
„Во моментов има 12 образовни асистенти за 15 деца со посебни потреби. За некој ден очекуваме да се комплетира тимот“, изјави Александар Филипчев директор на основното училишта „Ѓорѓија Пулевски“.
Асистентите во иднина ќе треба да го следат ученикот во целиот образовен процес. Ваквиот ангажман може да прекине само во случај ако нема потреба од негов ангажман или асистенот одлучи самиот да се исклучи од овој процес.
Ангажманот на асистентот може да прекине и доколку родителите на ученикот инсистираат на негова смена, односно сметаат дека детето може да постигне подобар успех со друг асистент.
Љубиша Владимиров
