Не попушта огнената стихија и во штипско. Од сношти пламените јазици почнаа да се шират и кон штипското село Пиперово. За да се заштити селото направени се обрачи околу него. Иако е ново жариште, пожарникари, војници, ловџии засега успеваат да го контролират.
„Јавните претпријатија, приватни субјекти со механизација ги прават потребните обрачи и трасираат линија која ќе биде како заштитна зона и можност за делување и спречување на евентуално ширење на пожарите коишто веќе зафатија делови на Серта од штипска страна„ изјави Иван Јорданов, градоначалник на Штип.
Под целосна контрола е ставен пожарот над Радовиш. Рано утринава таму се интервенираше со српски хеликоптер. Поради тешко пристапниот терен вчера градоначалникот на Радовиш побара дејствување од воздух. Пожарот направи голема штета во подножјето на планината Плачовица. Се претпоставува дека се опожарени околу 200хектари.
„Ние цело време на терен правиме дронски снимки, имаме и термо камери. За првично мислиме дека се работи од 150 до 200хектари борова шума, но очигледно подрачјето ни е поголемо. Точното мерење ќе го направиме кога пожарот во целост ќе биде локализиран„ изјави Ацо Ристов, градоначалник на Радовиш.
Огнената стихија остави пустош позади себе. Освен боровите шуми, во пламените јазици настрада дивеч и птици. Штетите допрва ќе се утврдуваат.
Александра Ристевска
