Хаос на Клиниката за токсикологија.Уште еден скандал поврзан со oрганизациската директорка Бесија Иљази.За само два месеци го зголемила долгот на инстутуцијата за речиси два милиони денари, не доаѓа на работа и не потпишува клучни документи, ова се дел од проблемите за кои алармираат вработените во клиниката. Тие обвинуваат, дека Иљази не е законски поставена затоа што не ги исполнува условите пропишани со закон за директори. Според нив поради нејзе во клиниката се случува дезорганизација, а не организација.
„За помалку од два месеца долгот на клиниката го зголеми за приближно два милиона денари, со дневно работно време од 4 часа и 30 минути, поточно на работа доаѓа во 10 часот, а работното време ѝ завршува во 14:30. Исто така, клиниката нема спроведено постапка за осигурување на имот, осигурување на скапата медицинска опрема и осигурување од лекарска грешка, бидејќи в. д. директорката не сака да потпише затоа што не е прифатен нејзиниот брокер за осигурување .Поради одбивање да потпише согласност за договор на дело за двајца дипломирани биолози, токсиколошката лабораторија веќе два месеца не врши валидација на издадените резултати“, се вели во писмото од вработените.
Одговор за обвинувањата од вработените засега нема, секретарката на директорката Иљази не информираше дека нејзиниот став ќе биде соопштен деновиве. Неофицијално, од извори на Клиниката, медицинскиот директор, д-р Данил Петровски трпи големи притисоци од министерот за здравство Илир Демири да потпише вработување на 18 лица на кои им истекле договорите на дело на 31.12.2023. Директорот одбивал да потпише, согласно насоките од Министерството за финансии, дека Македонија е во изборен период и дека треба да се почитуваат забраните.
Инаку, Бесија Иљази не знае македонски јазик, а преведувачи и се двете секретарки .Според информациите до кој дојдовме уште пред еден месец, економската директорка на работа доаѓала со придружба на нејзиниот татко кој постојано бил со неа како да е нејзино обезбедување.
