Џабе се разговори за инфраструктура, ако македонските превозници не можат да ја преминат границата. Вицепремиерот и министер за транспорт Александар Николоски на швајцарско-македонскиот бизнис форум го посочи како итен за решавање проблемот на транспортерите кои не можат слободно да возат во Шенген зоната. Вели дека другите држави треба да го земат примерот на Швајцарија, која е првата држава која почна да им дава долгорочни визи на македонските превозници.
„Швајцарија тука беше прва, за што се заблагодарувам. Почна да издава вакви работни визи за возачите и се се надевам дека тоа ќе биде пример што ќе го следат и останатите земји членки на Шенген зоната. Да не зборувам во делот на конкурентноста, колку е поевтино стоката која се произведува тука да биде извезена до крајната дестинација од домашен превозник, а колку е поскапо странски превозник да дојде, да ја земе па да ја однесе таму каде што треба. Ова е навистина голем голем предизвик за ние да зборуваме за проширување на граничните премини“ – вели Александар Николоски – Вицепремиер и министер за транспорт.
Извозот е прв приоритет за Македонија – вели Николоски. За таа цел, Владата интензивно вложува во инфраструктурата. Од изградбата на 6-те автопатишта, преку железницата кон Бугарија, подготовките за старт на брзата пруга од Табановце до Гевгелија, модернизација на пругата кон Кичево и градскиот воз во Скопје, до транспортниот логистички центар во Трубарево. Сите овие проекти треба да овозможат полесен и побрз транспорт на луѓе и стоки.
Македонија може да го искористи знаењето и искуството на Швајцарија како да стане главен економски играч во регионот и покрај тоа што е доминантно планинска држава без излез на море – вели амбасадорот на Швајцарија во земјава.
Од Швајцарско-македонската стопанска комора велат дека земјава треба повеќе да ги привлече нашинците од дијаспората да инвестираат во Македонија.
Швајцарско-македонскиот бизнис форум треба да го поттикне дијалогот помеѓу јавниот и приватниот сектор и да ги доближи швајцарските искуства до домашната бизнис-заедница. Засега трговската соработка меѓу двете држави е скромна и изнесувала над 170 милиони евра минатата година.
