По бурниот и насилен викенд во Франција и Албанија, протестите продолжија да се шират како шумски пожар низ Европа. Најновата метропола чии улици се преплавија со гневен народ беше Прага.
Илјадници луѓе излегоа на улиците на Прага барајќи слобода на медиумите и протестирајќи против планот на владата за реструктуирање на финансирањето на чешката јавна телевизија. Протестите во центарот на Прага, кои за разлика од тие во Париз и Тирана беа мирни, беа организирани од граѓанската иницијатива „Милион моменти за демократија“, а демонстрантите носеа транспаренти на кои пишуваше „Запрете ја владината ароганција и деструкција“ и „Не сакаме назад цензура“. Десничарската, популистичка влада на премиерот Андреј Бабиш сака да ја укине телевизиската такса и наместо тоа да ги финансира јавната телевизија и радиото од државниот буџет. Предложената реформа би вклучувала и намалување на финансирањето за повеќе од 15 проценти, што ги поттикна стравувањата за независноста на јавните радиодифузери во земјата. Законот го помина првото читање во Претставничкиот дом, долниот дом на парламентот, за време на необична ноќна седница. Чешкиот претседател Петр Павел го критикуваше брзањето на владата да го протурка законот, предупредувајќи дека процесот фрла сомнеж врз нејзините намери.
