Општина Куманово организира три буџетски форуми на кои граѓаните ќе можат да ги претстават своите предлози и потреби за креирањето на општинскиот буџет за 2027 година. Форумите ќе се одржат на 28 и 30 октомври и на 3 ноември, со почеток во 12 часот, во Занаетчискиот дом. На првите два форума, граѓаните ќе имаат можност да изнесат идеи, предлози и приоритети што би можеле да бидат вклучени во буџетот за следната година.
-Ги повикуваме граѓаните активно да се вклучат во процесот и да ги споделат своите потреби, предлози и забелешки во областите на економијата, инфраструктурата, образованието, социјалната заштита, животната средина, културата и спортот. Целта на буџетските форуми е да се зголеми учеството на граѓаните во одлучувањето за локалните приоритети и во креирањето на општинскиот буџет за 2027 година- изјави секретарот на општина Куманово, Емилија Сларидис Јаневска.
Активностите се реализираат во рамките на проектот „Заедници со интегритет“, финансиран од владите на Швајцарија и Шведска, а спроведуван од Националниот демократски институт (NDI). Во меѓувреме, тече и онлајн анкета преку која граѓаните можат да ги споделат своите идеи и предлози. Анкетниот прашалник е достапен на https://bit.ly/4siNuxm, а ќе може да се пополнува заклучно со 1 декември 2026 година.
