Во тек е реконструкција и унапредување на објектот во кој е сместена Територијалната противпожарна единица (ТППЕ) Куманово, информираше градоначалникот на Општина Куманово, Максим Димитриевски.
Реконструкцијата се реализира преку проект на Центарот за развој на Североисточниот плански регион, со поддршка од општествено-одговорни компании од градот.
Во рамки на активностите се поставуваат нови врати и ПВЦ-прозорци, се реконструира бифето и се обновуваат спалните соби, кои ќе бидат опремени со нови кревети. Предвидено е и поставување клима-уреди, метални ормари за противпожарните униформи, обезбедување нов канцелариски материјал, како и замена на олуците.
Според најавата на градоначалникот Димитриевски, во следната фаза е планирана и реконструкција на спортската сала во склоп на објектот.
