Минималната плата ќе продолжи расте во 2027 година. Министерот за економија Бесар Дурмиши по состанокот на Економско- социјалниот совет вели дека минималецот ќе расте поради порастот на трошоците за живот и просечната плата во државата. Смета дека моделот треба да остане ист и дека ценовните притисоци во последниве месеци почнале да попуштаат и покрај предизвиците на глобално ниво.
„Просечната потрошувачка кошница за четиричлено домаќинство во септември изнесувала 58.117 денари, што е за 358 денари помалку во однос на август, но за 1.736 денари повеќе споредено со јануари“ – вели министерот за економија Бесар Дурмиши.
На просечно четиричлено семејство му требаат 58.117 денари да го протурка месецот. Ова се најновите пресметки на министерството за економија за месец септември. Дурмиши признава дека животот поскапел од стартот на годинава, но истакнува дека сепак, има намалување на трошоците во септември споредено со август. Вели Државниот пазарен инспекторат е постојано на терен и засега не забележале повисоки маржи од 10, односно 15 проценти во трговијата на големо и мало. Доколку има таква појава, не исклучува мерки како ограничување на маржите.
На Економско-социјалниот совет, бизнис секторот не поднел детален предлог за плаќање по саатнина и скратување на бројот на празници во Македонија како што беше претходно најавено. Од друга страна, пак, синдикатите се спротивставија на ваквото барање и порачаа дека стопанството заговара кратење на работничките права. Инаку, ССМ пресмета дека синдикална кошница за четиричлено семејство во октомври изнесува 70.358 денари, што е за 926 денари повеќе отколку во септември. Само за храна и пијалоци се трошат над 26 илјади денари месечно.
