Меѓународната експедиција во подводната пештера Врело, која го продолжи истражувањето до длабочина од 338 метри и постави три светски рекорди, е меѓу најинтересните содржини на 17. издание на ЕХО – Фестивалот на планински филм, што вечерва почнува во киното „Фросина“ во Младинскиот културен центар во Скопје, со проекцијата на филмот „Frost: The Story of a Lifetime“.
Фестивалот, кој ќе трае до 30 октомври, носи програма составена од врвни алпинистички филмови, приказни за планинарењето и скијањето, женски перспективи во планинските спортови, како и теми посветени на природата, климатските промени и животот во планинските заедници.
Во фокусот се филмски приказни за истражување на непознатото, физичка и психолошка издржливост, односот меѓу човекот и природата, но и за предизвиците со кои се соочуваат планинските екосистеми и локалните заедници.
Особено место во програмата имаат алпинистичките филмови, кои ги обработуваат големите искачувања, ризикот и границите на човечките можности, како и филмовите што ги пренесуваат искуствата и достигнувањата на жените во планинарството и алпинизмот.
