Есента ги спушти температурите. Поради ладното време скопјани од утре ќе добијат топли радијатори.Наместо од 15 октомври централното парно ќе биде пуштено порано од предвиденото.
„Според податоците од Управата за хидрометеоролошки работи (УХМР), за 13 октомври е прогнозирана средна надворешна температура од 12 °C, со што се исполнети условите за производство, испорака и снабдување со топлинска енергија, согласно одлуката на РКЕ.“ – велат од ЕСМ.
Со средна температура под 12 степени парно греењето ќе се вклучува. Во октомври и првата половина од ноември ќе се регулира согласно надворешните температури.
„При точно утврдени атмосферски услови, кога надворешните дневни температури ќе достигнат одредени гранични вредности, испораката на топлинската енергија се прекинува, односно системот се исклучува. Веднаш по падот на температурите под утврдените гранични вредности, централното греење повторно се вклучува. Со ваквиот начин на регулирана испорака се обезбедува оптимална потрошувачка на топлинска енергија и минимални можни трошоци за греење на потрошувачите.“ – велат од ЕСМ.
Ноќите во изминативе две недели се особено ладни, но поголем дел од скопјани велат дека до сега не вклучиле клима или греалка за да ги загреат домовите.
„Греалка може да пуштиме ама се уште не е толку ладно, може да се пушти ама и не мора, не пуштаме греалки, ладно ми е навечер, не пуштаме ништо, сега за сега се облекуваме повеќе мислам дека е рано, Ладно е ама уште не пуштаме ништо.“- велат граѓаните.
Од ЕСМ апелираат до корисниците да ги завршат подготовките на своите внатрешни грејни инсталации и да си ги подмират сметките за електрична енергија. А заедниците на сопственици да обезбедат непречен пристап на службените лица до топлинските потстаници.
