Брисел контра СДСМ. За Европската Унија предлог – измените на изборниот законик се добри. Евроамбасадорот Михаил Рокас повика партиите да постигнат консензус и да ги излгасаат. Потсети и дека тоа е дел од реформската агенда.
„Законот сам по себе е добар закон. ОДИХР и Европската комисија дадоа позитивна проценка и оценка, но она што преостана во моментот се модалитетите. Разбирам дека има несогласувања кога станува збор за овие модалитети, но чувствувам дека има добра волја тоа да се надмине“, изјави Рокас.
Премиерот повторно порача дека е подготвен уште еднаш да седне на маса со СДСМ, со цел да се постигне договор, но додаде дека опозицијата нема аргументи со кои би го спречила гласањето на дијаспората. Остава простор да се договорат за начинот на кој тоа би се спровело.
„Еве, во ред, тие одлучиле дека, и покрај тоа што десетици земји во светот применуваат електронско гласање, а јас го имам и естонскиот модел комплетно разработен, еве, нека не биде така. До 2029 година, од претседателските избори па натаму, тие се исплашени, бидејќи велат дека и тогаш ќе бидеме опозиција. Мислат дека некој повторно ќе им ги украде изборите. Фројд понекогаш проработува. Мислат дека, како што тие се однесувале, така сите се однесуваат“, вели премиерот Мицкоски.
СДСМ не отстапува. Венко Филипче повтори дека гласањето на дијаспората за нив е црвена линија што нема да ја поминат. Тврди дека со сегашниот предлог се подготвува изборен грабеж.
„Зошто премиерот Мицкоски им става таков товар на нашите граѓани што живеат во дијаспора? Некој утре да им каже дека биле дел од изборна измама. Зошто ги изложуваат на таков ризик тие луѓе? Нека гласаат тука, еднакво како што сите ние гласаме“, истакна Филипче.
Изборниот законик засега останува заглавен во Собранието, откако СДСМ и Левица поднесоа 13 илјади амандмани.
