Патувањето од Скопје до Атина ќе се скрати за три до три и пол часа со новиот автопат Прилеп- Битола. Интензивно се работи на терен на делот од Коридорот 10Д, што ќе го поврзе цел регион ќе донесе повеќе туристи во Македонија и бизниси во Пелагонискиот регион.
Вицепремиерот и министер за транспорт Александар Николоски на својот Фејзбук профил објави видео во кое се гледа напредокот на изградбата на најголема поединечна делница што во моментов се гради во Македонија. Овој автопат ќе значи побезбеден и побрз сообраќај, подобра поврзаност, поголема конкурентност на стопанството и силен поттик за економскиот развој на Пелагонија, пишува Николоски.
„Ова е најдолгата поединечна делница автопат што се гради во Македонија. Нашата цел е првата половина на 2027 година да имаме пуштено во функција 10,5 км, а исто така во тек на следната година сообраќајот по целата должина од 40 км да се одвива по една коловозна лента, вели Александар Николоски, вицепремиер.
Автопатиштата на коридорите 8 и 10 се градат со силна динамика, а паралелно со тоа се инвестира и во железничката инфраструктура.
Низ 15 тунели и 29 мостови, со брзина до 120 километри на час, од октомври 2028 година треба да сообраќаат првите возови на делницата Бељаковце – Крива Паланка. Станува збор за вториот дел од железничкиот Коридор 8, каде што во моментов се изведуваат интензивни градежни работи. По завршувањето на оваа делница ќе почне изградбата и на третата, со која Македонија конечно треба железнички да се поврзе со Бугарија.
Истовремено се модернизираат патиштата во источниот дел на државата. Ќе се гради експресниот пар Радовиш – Струмица. Паралелно со оваа делница, објавен е и тендер за изградба на експресниот пат Кочани – Виница – Делчево.
Паралелно се работи и на еден од најзначајните инфраструктурни проекти во земјава – автопатот Кичево – Охрид. За негово комплетирање се обезбедени дополнителни 175 милиони евра, а според најавите на Владата, целата делница треба да биде пуштена во употреба во првиот квартал од 2027 година.
Во последните две години во локалната и регионалната инфраструктура се вложени повеќе од 350 милиони евра. Инвестирани се над 25 милиони евра за обнова на 96 улици во 72 општини, а реконструирани се повеќе од 72 километри локална патна мрежа.
