На Универзитетот „Гоце Делчев“ во Штип, денеска, од 18 часот, ќе се одржи јавна дебата за предлог-законот за високо образование во рамките на серијата дискусии на јавните универзитети, на кои присуствува министерката за образование и наука, Весна Јаневска.
Јавни дебати беа одржани на Универзитетот „Мајка Тереза“ – Скопје, Универзитетот „Св. Климент Охридски“ – Битола и вчера на Универзитетот „Св. Кирил и Методиј“ – Скопје и во Македонската академија на науките и уметностите.
Законот за високото образование и законот за квалитет во високото образование се поставени на националниот регистар на прописи (ЕНЕР), а засегнатите може да праќаат коментари и на двете е-адреси на МОН за двата предложени закона. На ЕНЕР од саботата е поставен и текстот на новиот закон за научноистражувачка дејност.
Министерката Јаневска соопшти дека сите предлози што се конструктивни ќе бидат прифатени, а техничките грешки во законите ќе бидат исправени. Сите аргументирани забелешки за кои работната група смета дека се прифатливи, рече таа, ќе бидат внесени во предложениот текст и потоа тој ќе остане уште неколку дена на ЕНЕР пред да оди во владина процедура.
– Дебатите ги одржуваме за да дојдеме до едно заедничко, по можност најдобро решение, затоа што Министерството за образование и наука не е спротивставена страна, туку, напротив, во соработка со универзитетите МОН го почна и на ист начин и ќе го заврши законот – изјави министерката Јаневска вчера пред почетокот на јавната дебата на УКИМ.
Таа регира на тоа што се пласираат неточни информации во јавноста, кои, рече, најмногу ѝ штетат на државата, а не на министерот.
– Деновиве се изнаслушавме дезинформации и ,би рекла, конкретни лаги дека се укинува вонредното студирање, дека државата не финансира објавување научноистражувачки трудови итн. Лагите и дезинформациите претпоставувам треба да бидат на штета на министерот или на партијата, но во суштина се штета на државата и на младите луѓе што живеат во неа. Оттука, апелирам дека треба да се престане со тоа затоа што сме отворени за секоја конструктивна критика. И како што веќе реков, сè што сметаме дека е во ред, ќе биде внесено во законот и веќе и се внесува за што е можно побргу да ја завршиме работата – изјави Јаневска додавајќи дека очекува дискусија на академско ниво.
