Првите читања од предлог законите за високото образование, за обезбедување на квалитет во високото образование и науката и за научноистражувачката дејност се на дневен ред на денешната Собраниска комисија за образование, наука и спорт.
По утврдувањето на дневниот ред претседателката на Комисијата Иванка Василевска даде пауза до 14 часот, на барање на пратеничката група на ДУИ поради учеството и на други Комисии во Собранието.
Еден час пауза имаше и по самиот почеток на седницата на барање на пратеничката Рина Ајдари од ДУИ, по неприфаќањето на барањето на пратеничката Арбана Пашоли од ДУИ да биде одложена за идната недела.
– Координаторката на парламентарната група, истовремено и членка на Комисијата за образование, побара еден час пауза со цел да имаме можност да сме присутни и во Комисијата за избори и именувања, и подоцна во 11:00 часот и во Комисијата за одбрана. Јас претходно, во мојата процедурална забелешка побарав Комисијата да се одложи за следната недела, имајќи ги предвид бројот на комисии кои се закажани денеска. Истовремено продолжува и Комисијата за финансирање и буџет, каде што ние имаме наши амандмани и денес за образложение се амандманите на Европскиот фронт, истакна Пашоли.
Таа смета дека законите кои денес се на дневен ред во Комисијата за образование се со особено значење и бараат како внимание, така и соодветна подготовка за добра дебата и подобар придонес.
