Најголемата штета од синоќешното невреме има во Клиничка болница-Штип, каде што од силниот ветар дел од кровот падна околу болницата. Градоначалникот на општина Штип, Иван Јорданов денеска изјави дека штети има и на кровните конструкции на ООУ „Ванчо Прќе“ кое е најголемо основно училиште во Штип и на детската градинка „Вера Циривири-Трена“.
-Односно тоа коешто можевме да го забележиме, кровната конструкција на Клиничката болница е најповеќе оштетена, но има неколку други јавни институции како што е основното училиште „Ванчо Прке“ – исто така има оштетен дел од кровната конструкција кој треба да се врати во првобитна состојба. Имаме и на детската градинка „Вера Циривири“ дел од кровната конструкција оштетено и дел од електричната инсталација, што значи дека мора да бидат доведени во нормална состојба и функционалност. За сето ова, Општината има надлежност во најбрз можен рок да констатира, во согласност со законските регулативи и можности. Така да, верувам дека во текот на денот, сите оние промени кои се настанати, оштетувања на јавни површини, урбана опрема и сето тоа коешто како последица се случило, ќе се потрудиме да го вратиме во првобитна состојба и во одредена функционалност-вели Јорданов.
Тој посочи дека сообраќајниците веќе се исчистени од кал и паднати дрвја, а штети има пријавено на кровни конструкции и на куќи, потоа поплавени домови и оштетени автомобили.
-Како локална самоуправа верувам дека успеавме навремено да реагираме и да го оспособиме градот да функционира. Сите сообраќајници се проодни. Јавната површина за којашто имавме променета состојба е доведена во нормална функционалност. Кровните конструкции на институциите веќе се прави проценка како да се постапува во периодот којшто следи. Сепак за одредени кровни конструкции треба да се одвојат финансиски средства за да бидат вратени во првобитна состојба-вели Јорданов.
Тој додаде дека во текот на денот комисија од страна на Општина Штип ќе ги констатира настанатите штети, а Општината е во комуникација со Владата и со ЗЕЛС за штетите на државни и локални институции. Во Клиничка болница-Штип утринава се изврши и проценка на штетата, информира заменик директорката на Клиничка болница-Штип, Билјана Ефтимова.
