Со тест од плунка за само три до десет минути ќе може да се утврди присуство на кокаин, амфетамин, метамфетамин, опијати, екстази, седативи, како и ТХЦ. Проверката ќе се врши директно на терен кај оние возачи кај кои ќе постои сомнеж од страна на полицијата. Од МВР велат дека веќе се нарачани првите 10.000 тестови од кинеско производство, кои се очекува да пристигнат на почетокот на август. Цената на еден тест изнесува 218 денари.
-Склучен е Договор за набавка на 10.000 илјади парчиња тестови за дрога. Со нивна употреба не е почнато бидејќи тече рокот за испорака согласно склучениот договор. Се очекува испораката да биде во првата половина од август– истакна портпаролот на МВР Гоце Андреевски.
Новите тестови се едноставни за употреба и не бараат дополнителни уреди, реагенси или медицинска опрема. Примерокот се зема преку орален брис, а постапката ќе трае помалку од една минута.Тестовите имаат точност од 99 проценти и за нивното користење не е потребно медицинско знаење.
-Тестирањето ќе се врши на местото каде што е сопрено возилото. Тестовите се карактеризираат со висока прецизност. Вакви видови на тестови се употребуваат прв пат а тестирањето се прави и сега со анализа на крв и урина– истакна портпаролот на МВР Гоце Андреевски.
Набавката е реализирана преку двегодишна рамковна спогодба, со максимален лимит од 80.000 евра за период од две години. Целта на брзите тестови е полесно откривање на возачи кои управуваат под влијание на наркотични средства за поголема безбедност во сообраќајот
