Нова енергија, нов импулс за повеќе работа и повеќе резултати. Забрзување на промените, на реформите, на економијата. Вака премиерот ги образложи причините за владината реконструкција, прва по две години од мандатот. Порача дека следува период во кој фокусот уште повеќе ќе биде ставен на ефикасноста, динамиката и испораката на резултати за граѓаните.
Христијан Мицкоски вели дека ги одобрил и ги прифатил предлозите за нови министри од коалициските партнери, но дека остава тие самите да ги соопштаат.
„Да, ги имам предлозите и за новите министри од ВРЕДИ и од партијата ЗНАМ, но ќе оставам тие да ги кажат, да не ги кажувам јас. За мене тие предлози се сосема во ред и очекувам да имаме уште поуспешна работа во новиот состав на Владата“, вели премиерот Христијан Мицкоски.
Засега се во игра неколку имиња кои медиумите ги објавуваат, а од ВРЕДИ се уште официјално не ги објавиле новите предлози.
На местото на Зоран Љутков, во Министерството за култура и туризам веројатно ќе дојде Седат Сулејмани, кој досега беше заменик-министер во истиот ресор. Нов министер за односи меѓу заедниците треба да биде Агон Ферати, додека кадарот на ЗНАМ во Правда, Игор Филков, ќе му ја отстапи министерската позиција на професорот по уставно право на Универзитетот на Југоисточна Европа, Јетон Шасивари.
ЗНАМ наместо правда ќе раководи со земјоделство. Предложен е Борче Серафимовски, актуелниот државен секретар во тој ресор.
Претходно, по седницата на ИК, ВМРО-ДПМНЕ ги соопшти предлозите за нови министри.
Со ресорот здравство ќе раководи актуелниот директор на ФЗОМ Сашо Клековски.
Во министерската фотелја во социјална политика, ќе седне актуелниот заменик-министер, Ѓоко Велковски.
За нов министер за локална самоуправа се предлага актуелниот вицепремиер и министер за односи меѓу заедниците Иван Стоилковиќ, а досегашниот Златко Перински ќе го пополни испразнетото место во Фондот за здравство.
Министер без ресор, задолжен за интеграција и имплементација на Стратегијата за инклузија на Ромите, ќе биде Ерџан Демир.
Владиното мнозинство ќе се зголеми за еден пратеник од Демократската партија на Турците. Партијата ќе добие министер без портфолио.