Водата во Гостивар ќе може повторно да се користи за пиење кога ќе иматри последователни негативни теста од испитаните примероци. Ова денеска го изјави министерот за здравство Сашо Клековски, кој рече дека, според прописите, не постои техничка вода и дека тоа е термин што најчесто го користат јавните комунални претпријатија.
– Постои класификација на водата од прва до петта категорија. Водата од прва категорија е погодна за лична употреба без третман, а кај петтата категорија со ниеден третман не може да ја оспособите за каква било употреба, вклучително и за наводнување во земјоделството. Според експертите за хигиена, вода за употреба е онаа што може да се пие, односно да се внесе во дигестивниот тракт, вклучително и преку храна, како миење салати, а нетермичката обработка на храната претставува ризик. Сè што е надвор од тоа може да се употребува за лична хигиена и за други цели – рече Клековски одговарајќи на новинарски прашања по прес-конференцијата по повод актуелната епидемиолошка состојба.
Toj појасни дека за сите други намени, како лична хигиена и други технички потреби, водата може да се користи.
– Значи, она што вчера беше потврдено од Управувачкиот комитет е дека водата во моментот може да се користи за други цели, освен да се внесува во телото и да се користи за третман на храна што не е термички обработена – потенцира Клековски.
Во врска со тоа дали таа вода може да се користи за наводнување, рече дека со вода од водоводот не би требало да се врши наводнување.
