Лидерот на Движењето ЗНАМ за Наша Македонија, Максим Димитриевски, денеска од трибината во Тетово порача дека ЗНАМ влегол во власта со јасна цел – да биде реформатор, но и коректор кога ќе биде потребно и оти ќе ги бранат принципите на коишто стојат.
Во своето обраќање Димитриевски нагласил дека ЗНАМ на политичката сцена влегол со јасна определба да биде носител на промени и да придонесе кон
создавање држава со ред, систем и еднакви можности за сите граѓани.
-Не влеговме во политиката за да бидеме продолжена рака на некого, туку за да изградиме политички субјект кој ќе се бори за држава со ред, систем и одговорност. Европска Македонија е Македонија во која граѓаните имаат доверба во институциите, младите гледаат иднина дома, а одлуките се носат според принципи, а не според интереси. ЗНАМ не е проект на еден човек, туку движење на луѓе кои веруваат дека Македонија може и мора да биде подобра држава, истакнал Димитриевски.
Тој порачал дека учеството на ЗНАМ во власта е водено од одговорноста да се спроведуваат реформи, но и да се укажува секогаш кога е потребно, со цел заштита на државните интереси и принципите на кои почива движењето.
Како што соопштија од партијата, во рамки на панел-дискусијата, генералниот секретар на Движењето ЗНАМ и министер за јавна администрација, Горан Минчев, ги претставил реформските процеси во јавната администрација и досегашните активности за изградба на професионални и функционални институции.
Потпретседателот на Движењето ЗНАМ и министер за земјоделство, шумарство и водостопанство, Борче Серафимовски, пак, се осврнал на мерките за поддршка на земјоделците, развојот на домашното производство и рамномерниот регионален развој, како основа за посилна и поконкурентна македонска економија.
