Три лица се уапсени, а над 100 килограми марихуана се запленети во голема полициска акција во Струмица, во која, според информациите, бил спречен обид за шверц на дрогата надвор од Македонија. Акцијата е резултат на темелна истрага и координација на струмичката полиција, а во неа биле разбиени организирани криминални структури поврзани со меѓународен канал за трговија со дрога.
– СВР Струмица разби меѓународен канал за трговија со дрога и заплени 100 килограми марихуана која беше превезувана, а целта беше да се извлече надвор од Македонија. Македонските граѓани можат да видат дека државата темелно се бори против нелегалната трговија со наркотици – изјави министерот за внатрешни работи Панче Тошковски.
Министерот, кој лично ја посети Струмица по акцијата, ја пофали полицијата за брзата и прецизна реакција.
– Информиран сум од началникот на СВР Струмица дека ќе даде предлог за наградување на полицајците, а јас ќе прифатам и соодветно ќе ги наградиме. Тие покажаа исклучителна професионалност и храброст во една операција која наликуваше на сцени од филм – токму такво беше и апсењето на криминалците што ја транспортираа дрогата – додаде Тошковски.
Заплената е еден од најголемите удари врз нарко-пазарот во регионот во последните месеци. Возилото во кое се превезувала дрогата било лоцирано и блокирано на влез во Струмица, а при претресот било откриено дека целата количина била уредно спакувана за меѓународен транспорт. Против приведените лица ќе биде покрената кривична постапка за неовластено производство и промет со наркотични дроги.
