Реформа, реорганизација и дигитализација ќе претставува еден од приоритетите на новата влада за да ги осовремени граничните премини за да се убрза протокот на возила меѓу Македонија и соседните земји. Ова го најави денес министерот за внатрешни работи, Панче Тошковски од граничниот премин Табановце каде се сретна со неговиот српски колега Ивица Дачиќ.
„Еден од основните пилари на новата влада особено во рамки на Министериството за внатрешни работи кој што е во наша надлежност, е интегриран систем на гранично управување, во рамки на кој што во граничен надзор влегува и граничен премин. Така да, реформа, реорганизација, дигитализација во овој дел, секако дека ќе претставува еден од приоритетите на министерството. Апсолутно дека ќе сториме се што е во наша надлежност и во наша моќ, да можеме да ги осовремениме, граничните премини и да го убрзаме протокот на возила помеѓу нашите пријателски земји“, рече министерот за внатрешни работи на Македонија, Панче Тошковски.
„Јас 100 пати барав, инсистирав, да може да се премине само со лична карта. Да се поедностави, да има само едно застанување. Секогаш имаше некакви административни проблеми и секогаш на крајот на оваа приказна и секогаш ќе има, еве додека стоиме тука, овде околу нас ќе има некој ќе кој ќе рече ама не може тоа така. Мислам, ајде да најдеме како може“, рече министерот за внатрешни работи на Србија, Ивица Дачиќ.
