Министерката за финансии Гордана Димитриеска-Кочоска оствари работен состанок со Џејсон Винички, заменик-директор за буџет и финансиска одговорност во Канцеларијата за техничка помош-ОТА на Министерството за финансии на САД.
На состанокот, како што информираат од Министерството за финансии, се разговараше за унапредување на буџетските процеси во рамки на Реформската агенда и имплементацијата на Законот за буџети, при што беше нагласено дека поддршката од Канцеларијата за техничка помош (ОТА) при Трезорот на САД има клучна улога во повеќе сегменти на планирањето и извршувањето на Буџетот, како и во унапредувањето на буџетското сметководство.
Министерството за финансии, со поддршка од Трезорот на САД и Канцеларијата за техничка помош – OTA, континуирано работи на зајакнување на институционалните капацитети и изградба на модерен и силен систем на јавни финансии.
Во рамки на соработката, системот за буџетско планирање Министерството за финансии, неговата структура, класификации и процеси – првично e развиен со техничка помош од САД и претставува цврста основа врз која денес се гради современо управување со јавните финансии.
Преку оваа техничка соработка досега се подготвени нацрт-верзии на сите клучни буџетски класификации: економска, функционална, програмска, организациска, како и класификацијата според извори на финансирање.
