Флагрантно кршење на основните права на одбрана на Дејан Давидовски – Дешо е одредениот притвор од 18 декември 2017 година кој се примени вчера кога тој стапна на македонска територија. Бранителот на Девидовски поднесе жалба по мерката која му е определена од судот во негово отсуство на барање на обвинителството. Адвокатот Тони Менкиновски за Алфа вели дека со притворот се прекршуваат повеќе домашни и меѓународни правни акти.
- „Според одбраната Решението КОК 384/17-24 на судијата на претходна постапка при Одделение за организиран криминал и корупција при Основен кривичен суд Скопје, претставува пример за флагрантно кршење на основните права на одбрана на секој обвинет/осомничен во кривична постапка, предвидени и уредени во Уставот на Р. Македонија, Законот за кривичната постапка како и Европската конвенција за заштита човекови права“ вели Менкиновски – адвокат.
Во 2017-та година судии од скопскиот Кривичен суд му определиле мерка притвор на Давидовски која ќе стапи на сила веднаш кога ќе биде достапен на органите на прогонот во Македонија. Обвинителството за него има отворено истражна постапка, но Давидовски кој е во притвор во Шутка – пред судот ќе треба да си ја презентира својата одбрана и доказите.
Давидовски е осомничен за терористичко загрозување на уставниот поредок и безбедноста. Тој пред пет години беше уапсен на аеродром во Шведска бидејќи по него трагаше Интерпол, но набрзо беше ослободен од тамошните власти и не беше екстрадиран во Македонија. Според шведскиот Врховен суд, не постојат доволно докази дека сторил дело тероризам, а во нивното образложение имаше и заклучок дека ако се врати во Македонија нема да му се суди фер и законски.
Давидовски во интервју за Алфа пред две година сведочеше дека судиите во Шведска едноставно се смееле гледајќи за што во Македонија се води судски процес за вакво тешко кривично дело.
- „Тоа не е тероризам туку обичен бунт, значи така го толкуваат во пресудата. Сите сознанија што ги прибираа, докази. Се смееја на нашите политичари тероризам што е делото, меѓутоа се има завршница. Делото ни најмалку не е тоа дело тероризам. Понискиот ранг на судии, па после и Врховниот Суд, петте судии кога одлучуваа, тероризам им беше многу смешно на нив“, изјави Давидовски на 26.04.2022 во интервју за Алфа.
Давидовски уште тогаш рече дека не се чувствува како терорист, изразувајќи надеж дека правдата брзо ќе дојде и сите осудени за 27 април ќе бидат на слобода. Според него политичарите кои го измонтирале ова дело, секогаш ќе живеат со тежината на себе, бидејќи се работело за човечки судбини.
