Зијадин Села од Алијанса за Албанците денеска до Уставниот суд поднесе иницијатива за оценување на уставноста на Законот за прекршоци, чие усвојување беше неопходно за функционирање на системот „Безбеден град“. Според Села, законот требало да биде предложен од Владата и да биде предмет на широка јавна расправа, наместо да биде предложен од пратеници и да се носи по скратена постапка.
На прашањето зошто амандмански не реагирале пред гласањето во Собранието во петокот, Села повтори дека ваков закон не требало да се носи во брза постапка, бидејќи тоа оневозможило детално разгледување на законските решенија.
Тој укажа дека законот не предвидува пораките што „Безбеден град“ ги испраќа до граѓаните за сторен прекршок да бидат двојазични, односно се испраќаат само на македонски јазик, со што, како што рече, се прекршува Законот за употреба на јазиците. Во оваа смисла, Села забележа дека е несериозно казните да пристигнуваат преку порака, бидејќи не постои законска обврска граѓаните да имаат мобилен телефон или електронска пошта.
