Родовата еднаквост не е избор, туку европски стандард и темелна вредност за демократско општество, силна економија и кохезија меѓу граѓаните. Ова беше заедничката порака на денешната конференција „Родовата еднаквост како камен-темелник на пристапувањето кон ЕУ“, на која претставници на Владата, Европската Унија и меѓународните организации нагласија дека интегрирањето на родовата перспектива е суштинска задача во процесот на евроинтеграции.
Сања Божиновска, министерка за енергетика, рударство и минерални суровини, истакна дека еднаквоста е правна обврска, но и интелигентна инвестиција.
-Во Европската унија родовата еднаквост не е споредна тема, туку темелна вредност вградена во европското право. Напредокот во ова поле е предуслов за стабилен и одржлив развој. Ние го прифаќаме овој стандард не затоа што мораме, туку затоа што веруваме во држава без привилегирани граѓани. Министерството што го водам е пример – со родов баланс 50:50 покажуваме дека институциите можат да бидат двигател на еднаквоста. Но, чувството на рамноправност не доаѓа автоматски – се гради, особено во сектори каде жените мора двојно да се докажуваат за нивниот глас да биде слушнат, рече таа.
Заменик-министерката за европски прашања, Викторија Трајков, нагласи дека родовата перспектива мора да биде интегрирана во сите поглавја од преговорите.
-Ова не е само европска обврска, туку суштинска потреба за праведно и инклузивно општество. Родовата еднаквост го забрзува економскиот развој, руши стереотипи и создава општество на можности. Без економско и социјално зајакнување на жените не може да има одржливост и благосостојба, порача таа.
Бен Нупнау, заменик-шеф на мисијата на ЕУ во Скопје, предупреди дека интегрирањето на родовата перспектива не смее да остане симболично.
-Тоа ја зајакнува правичноста и одржливоста на реформите. Македонија направи напори, но празнини постојат, а родовата политика често е подредена на други приоритети. Затоа е потребно јакнење на институциите, соработка со граѓанското општество и промовирање родово лидерство. ЕУ останува посветен партнер за да ја направиме еднаквоста реалност за сите, рече тој.
Весна Ивановиќ-Кастаред, раководителка на канцеларијата на UN Women, потсети дека родовата еднаквост е основен предуслов за функционална демократија.
-Родовата еднаквост е основен предуслов за функционална демократија, одржлива економија и инклузивно управување. Земјите-членки на Европската Унија се очекува да демонстрираат правна и институционална посветеност за еднакви можности и права, во согласност со европските стандарди за еднаквост, посочи таа.
Конференцијата што денеска се одржува во Скопје е посветена на улогата на родовата еднаквост како клучен елемент во процесот на пристапување на Македонија кон Европската Унија.
Настанот ги обедини институциите, експертите, меѓународните организации и граѓанскиот сектор со цел да се разгледаат предизвиците, обврските и можностите за интегрирање на родовата перспектива во сите фази од евроинтеграциите.
