Над 6.000 апликации за владината мерка за самовработување. Премиерот ги додели првите ваучери за изработка на бизнис план и порача дека се повеќе граѓани сакаат да ја преземат својата професионална иднина во свои раце. Со тоа, ќе се отвораат се повеќе бизници и нови работни места, што ќе придонесе за зајакнување на економијата.
Вкупната програма е дел од Оперативниот план за 2025 година, вреден над 40 милиони евра, со што ќе бидат опфатени над 16 и пол илјади луѓе, најмногу досега. Поради огромниот интерес, прераспределени се дополнителни средства.
Досега се издадени 2.916 ваучери за изработка на бизнис-план, а оценети се 2.681 апликации – од кои 1.140 се на млади до 29 години, 912 на лица над 29, и 629 на правни субјекти регистрирани како ДОО. Во тек е процесот за 2.545 нови договори за грант, по што следува дводневната обука за претприемачките вештини. Од вкупниот број апликации, 3.296 ги поднеле млади до 29 години, што премиерот го оцени како „посебно охрабрувачки – рече директорот на Агенцијата за вработување, Сељатин Бељули.
Според надлежните, обезбедена е рекордно зголемена финансиска подддршка. 7.000 евра за луѓе над 29 години, или 14.000 евра при здружување, 10.000 евра за млади до 29 години, или 20.000 евра при здружување.
Со годинашниот Оперативен план Владата вложува над 40 милиони евра за поддршка на активното вработување, преквалификација, самовработување и поддршка на претприемништвото. Преку мерките се очекува опфат на повеќе од 16.000 невработени лица низ различни програми, обуки и субвенционирани можности за вработување, рече министерот за економија Дурмиши.
Премиерот порача дека државата стои зад секој претприемач кој сака да започне сопствен бизнис. Вели, не потпишуваме само договори – туку и внесуваме нова енергија во економијата.
Денеска е важен ден и важен чекор за сите што сакаат да ја преземат иднината во свои раце. Sамовработувањето е една од најуспешните и најатрактивните програми во рамки на Оперативниот план. Оваа мерка е истовремено и силен инструмент во нашата стратешка борба против невработеноста. Наместо пасивни мерки и чекање на пригодни околности, ние ја менуваме филозофијата – од држава што само обезбедува социјална поддршка, во држава што создава можности и охрабрува личен напредок – истакна Мицкоски.
Надлежните уверуваат дека оперативниот план придонесува за отворање нови мали бизниси низ целата земја, од занаетчиски работилници и ИТ-стартапи, па се до мали производствени фирми. Ова е осомено важно во помалите општини каде нема големи фабрики или инвестиции, па луѓето добиваат шанса сами да си обезбедат работа и иднина.
