Со нови вработувања на околу шеесетина лица до крајот на годината, штипската Клиничка болница најавува јакнење на здравствениот кадар. Веќе е добиена согласност за продолжување на договорите на определено време, а во тек е постапка за вработување на неопределено за 25 работни позиции. Дополнително, во рамки на втората фаза од проектот на Министерството за здравство, се очекува вработување и на приватни специјализанти, што ќе придонесе за значително кадровско зајакнување на установата.
„Во понеделникот го пуштивме договорот за вработување на неопределено за 25. Оптимистички е и тие 31 што се на определено да ги трансформираме на неопределено. Тоа би било околу 56 до 60 вработувања. Дополнително, се надеваме на втората етапа од вработување на приватните специјализанти“, изјави д-р Владко Захариев, директор на КБ-Штип.
Во најавените нови вработувања, фокусот ќе биде ставен на средниот и техничкиот персонал, кадар со кој болницата во моментот најмногу кубури.
„Ќе има помалку доктори. Повеќе е среден и технички персонал, болничари, медицински сестри, шофери, а ќе има и вработување на административен кадар – економист, правник“, изјави д-р Владко Захариев, директор на КБ-Штип.
Буџетот на Клиничката болница се планира да се зголеми за 10 до 15 отсто, откако лани изнесуваше околу 870 милиони денари. Планирана е набавка и сервисирање на медицинска опрема, а ќе се реконструира и потпорниот ѕид, кој поради обилните врнежи од дожд падна и оштети две возила.