Клиниката за Онкологија прекршила 37 закони и правилници кога набавувала лекови за болните од рак. Министерството за здравство слепо се согласувало на барањата на УКРО, иако познат бил буџетот на ФЗО. Клиниката го пречекорила т.н условен буџет за над 170% иако немала согласност од Фондот. Овие поенти беа презентирани на Анкетната Комисија од страна на претседателката на ова собраниско тело, Рашела Мизрахи. Таа во обемна презентација претстави делови од извештаите на ревизорот, интерните процедури на клиниката и законите за здравствена заштита и јавни набавки, преку кои го претстави, како што рече – со докази – „внатресистемскиот башибозук кој царувал на Клиниката “.
“ Има потфрлање во планирањето и извршувањето на јавните набавки. Нема мислења од Фондот за здравство за стручните упатства. Се постапувало според пракса, а лековите субјективно ги препишувал лекарот, па тоа одело на одобрување кај директорот, што значи, субјективно се централизирала моќта и одлучувањето кој ќе добие а кој нема да добие биолошка терапија. Дали вината за протоколите е само кај директорот? Министерот за здравство мора да формира стручни комисии за разгледување на поединечните случаи за пациентите со малигни заболувања, а има и опција за телемедицински состаноци кога има пандемија со ковид и други кризи. Таа стручна комисија дискутира за третманот. Не може медицинскиот директор субјективно да одлучува, рече Мизрахи.
На пратениците од мнозинството не им се допадна презентацијата на Мизрахи, и ја обвинија за кршење на деловникот и изнесување на личен осврт на случувањата на Онкологија.
Според опозицијата, главен виновник за скандалот на Онкологија е поранешниот министер за здравство Венко Филипче, додека за пратениците од мнозинството, единствената цел на ВМРО-ДПМНЕ е политичка пресметка со СДСМ и оцрнување на екс-министерот за здравство.
Ања Лукарова
