Бројни делегации денеска положија цвеќе пред Споменикот на жена борец во Куманово. Градоначалник, совет, установи, институции, јавни претпријатија, АРМ, МВР; Здружение на борци, граѓани и политички партии положија цвеќе пред споменикот во чест на 8 Септември.
Во говорот градоначалникот на Куманово, Максим Димитриевски се осврна на историските моменти, потенцирајќи ги Илинденците и АСНОМ-ците, чија борба, претставува темел на стремежот кон слободна и демократска држава. На 8 септември 1991 година, граѓаните на референдум ја изразија својата волја за самостојна и суверена држава, со што беше испишана една од најсветлите страници во современата историја на земјата.
– Нашата сила е во заедништвото, а нашето богатство во различностите. Нашата иднина е во способноста да градиме мостови, а не поделби, да создаваме можности, а не пречки, и да гледаме напред со надеж и верба дека можеме и мораме да изградиме подобра и поубава држава, кажа Димитриевски.
Куманово, посочи тој е град во кој со децении се испреплетуваат различни култури, традиции и заедници, но заедништвото останува заедничка вредност. Во обраќањето Димитриевски ја потенцираше и потребата младите да ја гледаат својата иднина во земјата, како и создавање општество во кое трудот ќе се вреднува, солидарноста ќе се почитува, а секој граѓанин ќе има можност за достоинствен и подобар живот.
Триесет и пет годишнината од независноста, како што рече во говорот, е и можност за оддавање признание на сите генерации кои со својата работа, знаење и посветеност придонесувале за развојот на државата.
-Да не заборавиме дека најголемата сила на една држава е во самите граѓани коишто живеат во таа држава. Овој значаен јубилеј е можност да оддадеме признание на сите генерации кои со својата работа знаење и посветеност придонесувале за развој напредок на нашата татковина. Го честитам Денот на независноста на Македонија нека ни е вечна слободата и слободна и просперитетна Македонија-рече меѓу другото Димитриевски.
На свеченоста имаше културно-уметничка програма.
