Центарот за климатски промени, во соработка со Општина Карпош и ООУ „Лазо Трповски“, ја реализираше локалната климатска акција „Green Spaces, Safe Places – Зелени површини, безбедни места“, посветена на подигнување на јавната свест за значењето на урбаното зеленило и неговата улога во создавањето поздрави, побезбедни и климатски поотпорни јавни простори.
Активноста беше насочена кон истакнување на важноста на зелените површини во услови на климатски промени и сè поизразени високи летни температури.
-Урбаното зеленило придонесува за обезбедување сенка, намалување на прегревањето на урбаните површини и подобрување на условите за престој на отворено, поради што неговото зачувување и унапредување претставува важен дел од локалното климатско дејствување, наведува Центарот за климатски промени.
Централен дел од настанот одржан вчера беше едукативната и креативна активност со учениците од второ и трето одделение од ООУ „Лазо Трповски“, кои украсуваа саксии и засадуваа растенија, стекнувајќи практично искуство за грижата за зеленилото и одговорното однесување кон заедничките простори.
Како дополнителен придонес кон унапредувањето на урбаното зеленило, Центарот донираше три садници на Општина Карпош, наменети за засадување на соодветна јавна површина, во координација со надлежните општински служби.
Покрај едукативната и практичната активност со учениците, Центарот за климатски промени спроведе и прашалник за состојбата на зелените и јавните површини во општините низ Северна Македонија, со цел да се согледаат искуствата и ставовите на граѓаните во однос на достапноста, квалитетот, одржувањето и безбедноста на овие простори, како и нивните потреби и предлози за подобрување.
-Резултатите од прашалникот укажуваат на значително незадоволство кај дел од испитаниците од постојната состојба на зелените површини. Дури 87 проценти сметаат дека зеленилото во нивните населби е недоволно или дека постојното треба да се зголеми, додека 63 проценти ја оцениле општата состојба на зелените и јавните површини со ниска оценка (1 или 2 од 5). Дополнително, 76% од испитаниците дале ниска оценка за одржувањето и чистотата на зелените и јавните површини што ги користат. Овие податоци покажуваат дека, покрај потребата од нови зелени површини, особено внимание треба да се посвети и на квалитетот и редовното одржување на постојните, се наведува во соопштението.
Центарот за климатски промени посочува дека преку вклучувањето на најмладите, практичните активности и прибирањето граѓански мислења, ќе продолжи да промовира пристап во кој локалното климатско дејствување се темели на едукација, активно учество и конкретни придонеси кон заедницата.
