Засилени контроли на возилата при влез во Скопје, а ќе се користат и камерите на МВР за лов на несовесните граѓани кои од други градови и држави пуштаат улични кучиња низ скопските населби. Откако во Скопје се појавија глутници кучиња од Град Скопје најавуваат засилени мерки во соработка со Министерството за внатрешни работи. Главна цел е да се намали бројката на уличните кучиња кои неретко се агресивни и напаѓаат случајни минувачи и деца.
„Градот Скопје стапува во контакт со МВР за засилени контроли на сите типови возила на влезовите во главниот град, но и во внатрешноста на градот со цел пресретнување на евентуално транспортирање на кучиња, за што постојат сериозни индиции. Дополнително, во координација со МВР во предвид е и користење на камерите на МВР за да се разјасни ваквата состојба која ја загрозува јавната безбедност на граѓаните.“- велат од Град Скопје.
Дополнително од Град Скопје информираат дека неколку кучиња веќе се заловени и истите немаат никаква маркица. По реакциите на граѓаните откако во Карпош била донесена глутница од над 20 кучиња, кои не биле чипирани и стерилизирани, општината соопшти дека будно ја следи состојбата и бара заедничка соработка со Град Скопје и ЈП „Лајка“ за решавање на проблемот.
„Евидентно е дека бројот на бездомните кучиња во последните неколку денови е зголемен, па затоа, во соработка со Градот ќе работиме интензивно на изнаоѓање на решение за моменталната состојба, како и на трајно решавање на проблемот со уличните кучиња.“- велат од Општина Карпош.
Од ЈП „Лајка“ велат дека причната за појавата на глутниците е тоа што масовно и организирано со комбиња се носат кучиња од други градови и се истовараат во општините во Скопје. Нивните екипи веќе се на терен на повеќе локации во општината при што се врши заловување и хуман третман на кучињата согласно процедурите и стандардите за благосостојба на животните. Според статистиките на МВР во последните 3 месеци на територијата на Скопје 189 граѓани пријавиле дека биле нападнати од куче скитник, а најалармантно е во општините Гази Баба и Аеродром со 46 односно 39 пријави.