Старото училиште од село Нерово од Општина Житоше го префливме во Крушево каде што и припаѓа. Eден проблем е решен и префрлањето на училиштето во Крушево ни овозможува да размислиме за нови опции, дали ќе градиме ново или ќе го реконструираме старото, ќе се договориме со жителите, согласно потребите, информира денеска министерката за образование и наука Весна Јаневска.
Министерката на денешната прес-конференција одговарајќи на новинарско прашање посочи дека новата зграда е градена на диво и дека не се знаеле употребените материјали, ниту кој ја градел.
-За новоизградената зграда, за која мислеле жителите дека ќе биде училиште, во овој момент нема решение, тоа е зграда градена на диво вели народот. Не знаеме какви материјали се употребени кој ја градел и, не дај боже да се случи нешто таму џабе ќе ни биде после да бараме одговорност, затоа ќе одиме по легален пат согласно процедурите. Новата зграда нема можност ни да се испита затоа што нелегално е градена. Мора во земјава да почитуваме одредени правила кои ќе ни го подобрат животот, порача Јаневска.
Додаде дека не верува оти од септември ќе има настава во новиот објект.
-За од септември не верувам дека ќе продолжат во новиот објект. Во септември би можеле да им доградиме две училници како што барале во минатото, но инжинерите сега повторно ќе одат на терен ќе видат што може да се направи и може да се излезе засега со краткотрајно решение, информира министерката Јаневска.
